កំពង់ធំ៖ មានសេចក្ដីរាយការណ៍គួរអោយភ្ញាក់ផ្អើលមួយបានអោយដឹងថាពលរដ្ឋម្នាក់រងគ្រោះត្រូវគ្រាប់កាំភ្លើងរបស់មន្ត្រីបរិស្ថាន ចំណុះឲ្យមន្ទីរបរិស្ថានខេត្តកំពង់ធំ ខណៈពេលដែលជនរងគ្រោះម្នាក់នេះ កំពុងតែលួចចូលទៅកាប់និងអាឈើក្នុងដែនអភិរក្សព្រៃអង់តែន ស្ថិតនៅតំបន់ត្រពាំងឳឡឹក ស្រុកសន្ទុក ខេត្តកំពង់ធំ។
សេចក្ដីរាយការណ៍ថា ការបាញ់ប្រហារទៅលើ ពលរដ្ឋដែលបានចូលអាឈើ ក្នុងព្រៃហាមឃាត់ បានកើតឡើង កាលពីរសៀលថ្ងៃទី២៦ ខែមិថុនា ឆ្នាំ២០២១ បណ្តាលឲ្យជនរងគ្រោះ របួសចំត្រង់ភ្លៅខាងឆ្វេងបន្ទាប់មកបានបញ្ចូនជនរងគ្រោះមកសម្រាកព្យាបាលរបួសនៅ គ្លីនិកឯកជនមួយ នៅក្នុងស្រុកសន្ទុក ខេត្តកំពង់ធំ។
លោក តុប កក្តដា ប្រធានមន្ទីរបរិស្ថានបានឆ្លើយបំភ្លឺតាមទូរស័ព្ទកាលពីវេលាម៉ោង១និង៤៥ននាទី ថ្ងៃទី២៧ ខែមិថុនា ឆ្នាំ ២០២១ថា ករណីបាញ់មកលើពលរដ្ឋ គឺជាសិទ្ធការពារខ្លួនខណៈកន្លងមកមន្ត្រីបរិស្ថានធ្លាប់មានជនល្មើសកាប់ឲ្យរបួសម្តងរួចមកហើយ បណ្តាលឲ្យបែកក្បាល របួសធ្ងន់កន្លងមក ទើបខ្លាចក្រែងមានហេតុការណ៍ដូចមុនទើបការពារខ្លួន។
លោក តុប កក្តដា បន្ដថានៅថ្ងៃកើតហេតុមន្ត្រីបរិស្ថានប្រចាំការនៅស្នាក់ការចំនួន២នាក់ បន្ទាប់ពីលឺសូរ សំលេងអាឈើ មន្ត្រីបរិស្ថានម្នាក់បានចូលក្នុងព្រៃទៅមើល ក៏ស្រាប់តែប្រទះឃើញជនសង្ស័យ២នាក់ កំពុងតែធ្វើសកម្មភាព អាឈើ ខណៈនោះមន្ត្រីបរិស្ថានបាន ប្រាប់ឲ្យជនសង្ស័យទាំង២នាក់ ទម្លាក់ម៉ាស៊ីនអាឈើចុះ តែអ្នកទាំងពីរពុំបានទម្លាក់ចុះនោះឡើយ បែរជាគ្រវីម៉ាស៊ីនតម្រង់មកមន្ត្រីបរិស្ថានខណៈនោះមន្ត្រីអភិរក្សបានបាញ់កំភ្លើងបង្អើល តែគ្រាប់បានផ្លាតទៅចំភ្លៅបណ្តាលឲ្យរបួសតែម្តង លោកតុប កក្តដា ថាបើមានចេតនាបាញ់ សម្លាប់គឺស្លាប់បាត់ហើយ តែនេះគឺជាការពារខ្លួន ប្រសើរជាងត្រូវគេកាត់និងម៉ាស៊ីនអាឈើ ព្រោះជាមុនសញ្ញាចាស់ធ្លាប់បង្ករហេតុម្តងមកហើយ គឺត្រូវការពារខ្លួនរួចចាំដោះស្រាយគ្នាតាមនិតិវិធីច្បាប់ ។
តាមការឲ្យដឹងពី លោកឧត្តមសេនីយ៍ទោ ម៉ែន លី ស្នងការនគរបាលខេត្តកំពង់ធំបានឲ្យដឹងថាជនរងគ្រោះដែលត្រូវរបួសដោយសារគ្រាប់កាំភ្លើង មានឈ្មោះ ប៉ុន ផល្លា ភេទប្រុស អាយុ ២៤ឆ្នាំ រស់នៅភូមិសុភមង្គល ឃុំ ក្រយា ស្រុកសន្ទុក ខេត្តកំពង់ធំ ចំណែកមន្ត្រីបរិស្ថាន ដែលបានបាញ់ទៅលើជនរងគ្រោះ ដោយអះអាងថា ការពារខ្លួននោះ មានឈ្មោះចក់ សុជាតិ រស់ភូមិសរជ័យ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ បន្ទាប់ពីមានការហេតុការណ៍ បាញ់ពលរដ្ឋលោក ចក់ សុជាតិ បានមកផ្ទះ ទើបមន្ត្រីនៃស្នងការនគរបាលខេត្តកំពង់ធំ បាននាំខ្លួនមកស្នងការដើម្បីដោះស្រាយ។
