កំពង់ឆ្នាំង៖ កម្មករម្នាក់ធ្វើផ្លូវឲ្យក្រុមហ៊ុនជប៉ុនបានរងរបួសជាទម្ងន់ក្នុងហេតុការណ៍គ្រោះថ្នាក់ចរាចរណ៍ រវាងរថយន្តដឹកជញ្ជូនរបស់ក្រុមហ៊ុនវីរៈប៊ុនថាំបុកជាមួយម៉ូតូ ហេតុការណ៍នេះបានកើតឡើងនៅតាមបណ្ដោយផ្លូវជាតិលេខ៥ត្រង់ក្នុងចន្លោះគីឡូម៉ែត្រលេខ៨៥ និង៨៦ ស្ថិតក្នុងភូមិព្រៃពួច ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។
លោក ទឹម ចន្ធី អធិការនគរបាលស្រុករលាប្អៀរ បានអោយដឹងថា កម្មករធ្វើផ្លូវរបស់ក្រុមហ៊ុនជប៉ុន ដែលបានរងរបួសធ្ងន់ មានឈ្មោះ សេង សុភក្ត្រា អាយុ២២ ឆ្នាំ មានទីលំនៅភូមិចារថ្មី ឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង។
នៅមុនពេលកើតហេតុមានរថយន្តមួយគ្រឿងម៉ាក ហ៊ីយ៉ាន់ដាយ ពណ៌លឿង ពាក់ស្លាកលេខភ្នំពេញ 3P-4714 ជារថយន្តដឹកសម្ភារះរបស់ក្រុមហ៊ុន វីរៈប៊ុនថាំ បើកបរដោយជនមិនស្គាល់ឈ្មោះ ក្នុងទិសដៅពីជើងទៅត្បូង លុះមកដល់ចំណុចកើតហេតុ ក៏បានបុកម៉ូតូមួយគ្រឿងម៉ាកសង់កូរ៉េ ពណ៌ក្រហម គ្មានស្លាកលេខ បើកបរដោយជនរងគ្រោះ បណ្ដាលឲ្យរងរបួសជាទម្ងន់ និងបានដឹកទៅសង្គ្រោះនៅមន្ទីរពេទ្យខេត្តកំពង់ឆ្នាំង ។
លោក អធិការបន្ដថាក្រោយពេលរថយន្តបុកជាមួយម៉ូតូ រថយន្តមិន បានឈប់នោះទេ គឺអូសម៉ូតូដែលជាប់ពីក្រោមរថយន្តចម្ងាយជាង៦០ម៉ែត្រ បង្ករចេញជាផ្កាភ្លើងឆេះម៉ូតូនិងបន្តឆេះរថយន្ត ចំណែកអ្នកបើកបររថយន្តបានចុះរត់គេចខ្លួនបាត់ ។
ក្នុងហេតុការនោះដែរ រថយន្តពន្លត់អគ្គីភ័យ២គ្រឿងបានចេញអន្តរាគមន៍ពន្លត់ ទើបអគ្គីភ័យឆេះត្រឹមតែកាប៊ីនរថយន្ត មិនរាលដាល មកឆេះផ្នែកខាងក្រោយ ដែលមានសម្ភារៈ របស់អ្នកផ្ញើរពេញមួយឃ្លុបរថយន្តខាងក្រោយ ។
ក្រោយពេលកើតហេតុ សមត្ថកិច្ចបានយករថយន្តស្ទូច មកស្ទូចរថយន្ត ទៅដាក់នៅអធិការដ្ឋាននគរបាលជាមួយម៉ូតូជនរងគ្រោះ ។ចំណែកបញ្ញើរបស់អតិថិជន ដែលនៅសេសសល់ ត្រូវសមត្ថកិច្ច ឱ្យក្រុមហ៊ុនវីរៈប៊ុនថាំ ផ្ទេរដាក់រថយន្តផ្សេង ដឹកយកទៅឱ្យអតិថិជនបន្ត៕
