កំពង់ធំ ៖ លោកតាចំណាស់ម្នាក់ត្រូវ កា ឡេថង បុកពីក្រោយក្នុងទិសដៅស្របគ្នា បណ្ដាលអោយដួលបោកក្បាលស្លាប់ភ្លាមៗនៅកន្លែងកើតហេតុ ហេតុការណ៍បានកើតឡើងកាលពីវេលាម៉ោង ១០ និង៣០នាទី កាលពីថ្ងៃទី០១ ខែ ឧសភា ឆ្នាំ២០២០ ត្រង់ចំនុចកែងទឹកស្អាត ក្នុងភូមិ អូរត្នោត ឃុំងន ស្រុកសណ្ដាន់ ខេត្តកំពង់ធំ។
តាមការរៀបរាប់របស់កូន ជនរងគ្រោះ បានអោយដឹងថា ឪពុករបស់ខ្លួនត្រូវកាឡេថង (គោយន្ត កន្ត្រៃ)បុកពីក្រោយខណះពេលគាត់ជិះកង់ទៅបុណ្យ បណ្ដាលអោយស្លាប់ភ្លាមៗនៅកន្លែងកើតហេតុ សពមានឈ្មោះ ចាន់ វ៉ាន អាយុ ៧២ឆ្នាំ រស់នៅក្នុងភូមិ ឃុំខាងលើ ។
ជនបង្ក ឈ្មោះ លឿន អាយុ ៣០ឆ្នាំ រស់នៅភូមិ ទឹកម្លាង ឃុំសណ្ដាន់ ស្រុកសណ្ដាន់ ខេត្តកំពង់ធំ។
លោក សិត ភូយ មេឃុំងន ស្រុកសណ្ដាន់ បានអោយដឹងថា លោកគ្រាន់តែជាអ្នកសម្របសម្រួលរវាងជនបង្កនិងក្រុមគ្រួសារជនរងគ្រោះពីសំណង់ក្នុងការធ្វើបុណ្យតែប៉ុណ្ណោះក្រោយការសម្របសម្រួលរួច ខាងក្រុមគ្រួសារជនរងគ្រោះព្រមទទួលលុយ ១៧០០ដុល្លា សំរាប់ធ្វើបុណ្យសព ចំណែករឿងអីផ្សេងៗទៀត លោកមិនបានដឹងទេ។
លោក អ៊ួង ម៉ូលី អធិការនគរបាលស្រុកសណ្ដាន់ បានអោយដឹង នៅព្រឹកថ្ងៃទី០២ ខែ ឧសភា ឆ្នាំ២០២០នេះថា វត្ថុតាងនិងមនុស្សត្រូវបានដោះលែងវិញហើយទៅតាមបញ្ចារបស់លោកព្រះរាជអាជ្ញាអមសាលាដំបូងខេត្តកំពង់ធំ ។
លោក ស៊ិន វិរះ ព្រះរាជអាជ្ញាអមសាលាដំបូងខេត្តកំពង់ធំ បានអោយដឹងតាមទូស័ព្ទ នៅព្រឹកថ្ងៃទី០២ ខែឧសភា ឆ្នាំ២០២០នេះថា ដោយសារតែភាគីខាងជនបង្កព្រម ជូនសំណង់ដល់ភាគី ជនរងគ្រោះ រួចហើយទើបជនបង្ក និងវត្ថុតាងត្រូវបានដោះលែងអោយប្រកបរបរវិញ ប៉ុន្ដែរមិនមែនមានន័យថា រួចបណ្ដឹងអាជ្ញានោះទេ ពេលតុលាការកោះហៅ ជនបង្កត្រូវតែបង្ហាញខ្លួនគ្រប់ពេល បើមិនដូច្នោះទេនិងត្រូវចាប់ខ្លួន៕ ប៊ុន រិទ្ធី
