សៀមរាប ៖ ប្ដីប្រច័ណ្ឌប្រពន្ធបានយកកាំបិតចាក់ប្រពន្ធអោយរងរបួសធ្ងន់ រួចចាក់ខ្លួនឯងបណ្ដាលឲ្យស្លាប់ ពេលបញ្ចូនទៅសង្គ្រោះនៅមន្ទីរពេទ្យហេតុការណ៍បានកើតឡើងវេលាម៉ោង៣និង៣០នាទីថ្ងៃទី០៤ ខែឧសភា ឆ្នាំ២០២០ចំណុចវាលស្រែជាប់វត្តត្រកៀត ក្រុមទី៤ ក្នុងភូមិគោករុន ឃុំមុខប៉ែន ស្រុកពួក ខេត្តសៀមរាប។
សមត្ថកិច្ចបានអោយដឹងថាប្ដីឈ្មោះ វង់ ផុស ហៅញាញ អាយុ៣២ឆ្នាំ ស្រុកកំណើតនៅ ភូមិបុស្សក្រឡាញ់ សង្កាត់ជ្រាវ ក្រុងសៀមរាប ខេត្តសៀមរាប។ប្រពន្ធឈ្មោះ បោះ គឿន អាយុ២៥ឆ្នាំ រស់នៅ ភូមិ ឃុំកើតហេតុខាងលើ។
លោកវរសេនីយ៍ឯក ទេព ពុំសែន អធិការនគរបាលស្រុកពួកបានអោយនៅព្រឹកថ្ងៃទី៥ខែ ឧសភា ឆ្នាំ២០២០ថានេះករណីអំពើហិង្សាកើតចេញពីការប្រច័ណ្ឌរហូតកើតទំនាស់ឈានដល់ភាគីប្តី បានប្រើអាវុធកាំបិតចុងស្រួចដងឈើស្រោបដែក ប្រវែង៣៧ សង់ទីម៉ែត្រ ចាក់ទៅលើប្រពន្ធនិងចាក់ពោះខ្លួនឯងបណ្ដាលឲ្យស្លាប់ពេលទៅដល់មន្ទីរពេទ្យ។
លោកថាភាគីប្តី រងរបួសមុតចូលសាច់ពោះដាច់ចេញពោះវៀនមកក្រៅ រួចលោតទំលាក់ទឹកស្រះ ហើយបានស្លាប់ពេលរថយន្តសង្គ្រោះបញ្ចូនដល់ពេទ្យបង្អែកពួក។ ចំណែកប្រពន្ធ ត្រូវរងរបួសមុតចូលសាច់ពោះក្បែរក្រលៀនខាងស្ដាំ ១កន្លែង, មុតរយះសាច់ដៃស្ដាំ ១កន្លែង ធ្ងន់ធ្ងរកំពុងសង្គ្រោះនៅពេទ្យបង្អែកខេត្តសៀមរាប។
តាមការបំភ្លឺលោកមេភូមិ និងពលរដ្ឋរស់នៅជិតខាងបានឱ្យដឹងថាប្តីប្រពន្ធ ពួកគេមានជំលោះញឹកញ៉ាប់ ប្ដីតែងតែប្រច័ណ្ឌប្រពន្ធខ្លាំងក្នុងអំឡុង១ខែមុននេះគ្រួសារពួកគេជំលោះគ្នា ប្តីហូបបាយវត្តត្រកៀត (ជិតផ្ទះ) មិនបាននិយាយរកប្រពន្ធទេលុះក្នុងពេលកើតហេតុភាគីប្រពន្ធកំពុងបោកខោ-អាវនៅមាត់ស្រះក្នុងបរិវេណវត្តត្រកៀត ត្រូវប្ដីដើរទៅរករឿងប្រវាយប្រតប់គ្នា ឈានដល់ការចាក់ទៅលើប្រពន្ធ និងចាក់ខ្លួនឯងតែម្ដង។
ក្រោយកើតហេតុសមត្ថកិច្ចចុះពិនិត្យធ្វើកំណត់ហេតុ ដោយលោកសហការជាមួយការិយាល័យនគរបាលបច្ចេកទេសវិទ្យាសាស្ត្រខេត្ត ពិនិត្យសាកសព តាមនីតិវិធី រួចក៏បានប្រគល់សព ជូនក្រុមគ្រួសារធ្វើបុណ្យតាមប្រពៃណីនៅវត្តត្រកៀត៕ប៊ុនរិទ្ធី
