ខេត្តកំពង់ធំ ៖ ពលរដ្ឋ២៤៧គ្រួសារ ដែលរងគ្រោះដោយសារទឹកជំនន់ ក្នុងស្រុកប្រាសាទបល្ល័ង្ក បានទទួលអំណោយ ពីឯកឧត្តម សុខ លូ អភិបាលខេត្តកំពង់ធំនិងលោក ឃឹង នុភាព តំណាងរាស្ត្រខេត្តកំពង់ធំ! ដោយមានការចូលរួមពីអភិបាលរងខេត្ត អភិបាលស្រុក ក្រុមប្រឹក្សាខេត្ត និងមន្ទីរពាក់ព័ន្ធ ព្រមទាំងកងកម្លាំងទាំងបីប្រភេទ មានកម្លាំងតំបន់ប្រតិបត្តិការសឹករងកំពង់ធំ ចំនួន៨៣នាក់ជាអ្នកដឹកជញ្ជូនយកអំណោយទៅចែកជូនប្រជាពលរដ្ឋនៅភូមិ ត្រពាំងព្រីង ឃុំសាគ្រាម ស្រុកប្រាសាទបាល័ង្គ ខេត្តកំពង់ធំ ។
ដោយមានការយកចិត្តទុកដាក់និងអាណិតអាសូរបងប្អូនប្រជាពលរដ្ន ពីសមណាក់រាជរដ្នាភិបាលនិងថ្នាក់ដឹកនាំខេត្ត ទោះបីភូមិត្រពាំងព្រីងនៅដាច់ស្រយាលពិបាកក្នុងការធ្វើដំណើរឆ្លងកាត់ទឹកហូរផ្ដាច់ផ្លូវ ផ្តាច់ស្ពាន ថ្នល់ ក៏មិនអាចរារាំងសកម្មភាពមនុស្សធម៌ ដោយមានការដឹកនាំ ពីឯកឧត្តម សុខ លូ អភិបាលខេត្តកំពង់ធំបានឡើយ ក្នុងសកម្មភាពនេះចាំបាច់តម្រូវអោយសកម្មភាពមនុស្សធម៌ប្រើប្រាស់គ្រប់មធ្យោបាយ លើកលីអំណោយដើរឆ្លងកាត់ទឹកហូរជាច្រើនកន្លែង ប្រើប្រាស់ គោយន្ត កាណូត និងកម្លាំងថ្មើរជើង រួមចិត្ត រួមកម្លាំងពីបងប្អូនប្រជាពលរដ្ឋទើបអាចយកអំណោយមនុស្សធម៌ជូនដល់ពលរដ្នដែលរងគ្រោះបានទៅដល់គោលដៅប្រកបដោយជោគជ័យ។
ឯកឧត្តមសុខ លូ បានកោតសរសើរដល់កម្លាំងសមត្ថកិច្ចទាំង៣ប្រភេទនិងកម្លាំងសហប្រតិបត្តិការទាំងអស់ដែលបានសាមគ្គីគ្នាបានល្អក្នុងការជួយសង្គ្រោះនិងជួយដឹកជញ្ចូនអំណោយចែកជូនពលរដ្នរងគ្រោះដោយសារទឹកជំនន់បានដោយជោគជ័យ និងទាន់ពេលវេលា ! ឯកឧត្តម ក៏បានអំពាវនាវដល់បងប្អូនប្រជាពលរដ្ឋ ឲ្យថែរក្សាសុខភាពអនាម័យ ដេកក្នុងមុង ហូបស្អាតផឹកស្អាត និងការពារពីសុវត្ថិភាពពីពួកសត្វអាសេរពិស ជាពិសេសការពារអាយុជីវិតក្មេងៗនិងមនុស្សចាស់ ជៀសវាងមានគ្រោះថ្នាក់ដោយសារទឹកជំនន់។
ឯកឧត្តមក៏បានពាំនាំនូវការផ្តាំផ្ញើរសួរសុខទុក្ខបងប្អូនប្រជាពរដ្ឋពីសំណាក់សម្ដេចអគ្គមហាសេនាបតីតេជោហ៊ុនសែន ប្រមុខរាជរដ្ឋាភិបាល ដែលបានគិតគូរចំពោះសុខទុក្ខ របស់បងប្អូនប្រជាពលរដ្ឋ ខណៈ ពេលដែលទទួលរងគ្រោះដោយសារទឹកជំនន រួមទាំងបានចាត់ក្រុមការងារថ្នាក់ខេត្ត ក្រសួង និងស្ថាប័នពាក់ព័ន្ធ រួមទាំងសាខាកាកបាទក្រហម ចុះជួយប្រជាពលរដ្ឋឲ្យបានទាន់ពេលវេលានៅតាមមូលដ្ឋាន ដោយមិនទុកឱ្យបងប្អូនប្រជាពរដ្ឋ ណារងគ្រោះអត់អាហារដោយមិនបានដឹងឮពីអាជ្ញាធរនោះឡើយ៕
