កំពង់ធំ ៖ ឯកឧត្តម ខាន់ ខុន ទីប្រឹក្សាក្រសួងធម្មការនិងសាសនានិងជានាយកសមាគមបេសកកម្មដំណឹងល្អ សហការជាមួយក្រុមហ៊ុនប៊ីម៉ារៀលអ៊ីស្ទេត(BemaReal Estateco.Ltd) បានណែនាំដល់ប្រជាពលរដ្ឋត្រូវថែរក្សាសុខភាពនៅ
រដូវរំហើយនេះ។
ការអំពាវនាវបែបនេះរបស់ឯកឧត្តម ខាន់ ខុន នៅក្នុងពិធីចែកអំណោយមនុស្សធម៌ដល់ប្រជាពលរដ្ឋរងគ្រោះ និងងាយរងគ្រោះចំនួន៨០គ្រួសារ មកពីឃុំក្រវ៉ានិងឃុំចើងដើង ស្រុកបារយណ៍ ខេត្តកំពង់ធំ
រសៀល ថ្ងៃទី០១ ខែ វិច្ឆិកា ឆ្នាំ២០២០។ ពិធីនេះមានការអញ្ជើញចូលរួមពីលោក ឃន ចាន់ថៃ អភិបាលរងស្រុកបារាយណ៍ មន្ត្រីរាជការជុំវិញស្រុកនិងប្រជាពលរដ្ឋជាច្រើនរូប ។
ឯកឧត្តម ខាន់ ខុន បានលើកឡើងថាជានិច្ចកាលសមាគមបេសកកម្មដំណឹងល្អ តែងតែយកចិត្តទុកដាក់គិតគូរពីសុខុមាលភាពរបស់ប្រជាពលរដ្ឋ ជាពិសេសប្រជាពលរដ្ឋងាយរងគ្រោះ ចាស់ជរា ជនពិការ ស្ត្រីមេមាយ កុមារកំព្រា ឬជនងាយរងគ្រោះដោយប្រការផ្សេងៗ ដោយមិនប្រកាន់និន្នាការនយោបាយអ្វីឡើយ។ ជាក់ស្តែងគ្រួសារងាយរងគ្រោះ ស្ត្រីមេម៉ាយនិងចាស់ជរាទទួលបានអំណោយមនុស្សធម៌របស់សមាគមនបេសកកម្មដំណឹងល្អដើម្បីជួយសម្រាលនូវទុក្ខលំបាកបានមួយរយៈទោះបីជាអំណោយដែលចែកពេលនេះបន្តិចបន្តួចក៏ពិតមែននេះជាការចែករំលែកនូវក្តីស្រឡាញ់ចំពោះបងប្អូន។
ជាមួយគ្នានេះដែរឯកឧត្តម ខាន់ ខុន ក៏បានណែនាំដល់ប្រជាពលរដ្ឋទាំងអស់ត្រូវគិតគូរពីបញ្ហាការថែទាំសុខភាព ដោយបរិភោគទឹកស្អាត គេងក្នុងមុងជានិច្ច និងសម្អាតបរិស្ថានជុំវិញផ្ទះ ចៀសវាងការកើតមាននូវជំងឺគ្រុនចាញ់ និងជំងឺគ្រុនឈាម ។ ម្យ៉ាងទៀត ត្រូវខិតខំចិញ្ចឹមសត្វ និងបង្កើនការដាំដុះដំណាំចម្រុះផ្សេងៗ ដើម្បីធ្វើយ៉ាងណាលើកស្ទួយកម្រិតជីវភាពរស់នៅឱ្យមានលក្ខណៈសមរម្យ និងកាត់បន្ថយការចំណាយប្រចាំថ្ងៃ។
ឯកឧត្តមក៏បានផ្ដាំផ្ញើ និងសំណូមពរដល់ប្រជាពលរដ្ឋមានការប្រុងប្រយ័ត្នពេលបើកបរត្រូវពាក់មួកសុវត្ថិភាព នឹងដាក់ខ្សែក្រវាត់ ដើម្បីចៀសវាងគ្រោះថ្នាក់ចរាចរណ៍ ត្រូវអប់រំកូនឲ្យចៀសឆ្ងាយពីគ្រឿងញៀននិងនិងចូលរួមទប់ស្កាត់នូវជម្ងឺកូវីដ១៩ ដោយអនុវត្តតាមការណែនាំរបស់ក្រសួងសុខាភិបាល។
ឯកឧត្តម ខាន់ ខុន បានបន្តថា សមាគមបេសកកម្មដំណឹងល្អ ជាអង្គការគ្រីស្ទបរិស័ទក្នុងស្រុក ដែលបង្កើតឡើងក្នុងគោលបំណងជួយរួមចំណែកដល់រាជរដ្ឋាភិបាលក្នុងការអភិវឌ្ឍន៍ប្រទេសជាតិតាមរយៈការងារមនុស្សធម៌ តាមលទ្ធភាពដែលខ្លួនអាចធ្វើបាន។
ជាមួយគ្នានេះដែរលោក ឃន ចាន់ថៃ បានថ្លែងអំណរគុណដល់ឯកឧត្តម ខាន់ ខុន ទីប្រឹក្សាក្រសួងធម្មការនិងសាសនា និងជានាយកសមាគមបេសកម្មដំណឹងល្អរួមនឹងក្រុមហ៊ុន ប៊ីម៉ារៀលអ៊ីស្ទេត ដែលតែងតែជួយដល់ប្រជាពលរដ្ឋក្នុងស្រុកបារាយណ៍ក៏ដូចជាខេត្តកំពង់ធំក្នុងការលើកស្ទួយជីវភាពគ្រួសារឲ្យមានភាពប្រសើរឡើង ។
អំណោយដែលត្រូវចែកជូនបងប្អូនចំនួន៨០គ្រួសារដោយក្នុងមួយគ្រួសារទទួលបាន អង្ករ មី ទឹកត្រី ។
