ខេត្តតាកែវ ៖ ព្រឹកថ្ងៃអង្គារ ទី១ កក្កដា ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញចូលរួម “ទិវាមច្ឆជាតិលើកទី២០” នៅបឹងទន្លេបាទី ស្រុកបាទី ខេត្តតាកែវ ។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងក្នុងពិធី “ទិវាមច្ឆជាតិ លើកទី២០” នៅបឹងទន្លេបាទី ស្រុកបាទី ខេត្តតាកែវ នាព្រឹកថ្ងៃអង្គារ ទី១ ខែកក្កដា ឆ្នាំ២០២៥ ថាត្រីនៅក្នុងទន្លេ និងបឹង បើបានផល គឺសម្រាប់ទាំងអស់គ្នា, ការកើនឡើង នៃ បរិមាណត្រី ដែលកើតពីការចូលរួមក្នុងការទប់ស្កាត់បទល្មើសនេសាទខុសច្បាប់ ក៏បានធានា ការផ្គត់ផ្គង់ និងតម្លៃក្នុងការបំពេញសេចក្តីត្រូវការទីផ្សារ និងសន្តិសុខស្បៀង។ លទ្ធផលនេះ គឺកើតពីការប្រើប្រាស់កម្លាំងសរុប ដែលជាការចូលរួមពីគ្រប់កងកម្លាំង និងអាជ្ញាធរគ្រប់ជាន់ថ្នាក់ ហើយអ្វីដែលយើងសប្បាយរីករាយ គឺបរិមាណត្រីមានការកើនឡើង លក់មិនអស់ និង រក្សាបានតម្លៃ សមរម្យ។
ជាមួយនឹងសមិទ្ធផលវិជ្ជមាននេះ, សម្តេចបវរធិបតី នាយករដ្ឋមន្ត្រី បានគូសបញ្ជាក់ច្បាស់ថា កម្ពុជា ក្លាយជាប្រទេសដែលធានាបាននូវសន្តិសុខស្បៀង គឺដោយសារកត្តា២ គឺ៖ សន្តិភាព និងគោល នយោបាយ។ ជាក់ស្តែង, ពីមុនកម្ពុជាធ្លាប់ជាអ្នកធានាក្នុងការផលិត និងផ្គត់ផ្គង់ស្បៀង ក៏ប្រែក្លាយទៅជាប្រទេសនាំចូលផលិតផលស្បៀងពីខាងក្រៅ ក្នុងពេលប្រទេសធ្លាក់ក្នុងភ្លើងសង្គ្រាម, តែ បច្ចុប្បន្ន, រាជរដ្ឋាភិបាលបានប្រែក្លាយកម្ពុជា ទៅជាប្រទេសដែលធានាបាននូវការផ្គត់ផ្គង់ស្បៀង និង នាំចេញ ដែលចូលរួមបង្កើនចំណូលដល់សេដ្ឋកិច្ចជាតិ។ ជារួម, សមិទ្ធផលនៃកត្តាសន្តិភាព បានប្រែក្លាយកម្ពុជា ទៅជាប្រទេសដែលធានាបាននូវសន្តិសុខស្បៀង សម្រាប់ប្រជាជនប្រើប្រាស់ផង និង សម្រាប់នាំចេញផង ដែលការណ៍នេះ រួមចំណែក ដល់ការអភិវឌ្ឍប្រទេសជាតិ។ ជាមួយនេះ, កត្តាគោលនយោបាយដែលរាជរដ្ឋាភិបាលបានដាក់ចេញ ហើយ បានធ្វើ និងបន្តធ្វើយ៉ាងសកម្ម រួមមានដូចជា៖ ដីកសិកម្មមិនយកពន្ធ, សម្ភារៈបម្រើការផ្នែកសិកម្មមិនយកពន្ធ, ការអភិវឌ្ឍហេដ្ឋារចនាសម្ព័ន្ធបម្រើវិស័យកសិកម្ម, ប្រព័ន្ធធារាសាស្ត្រ, អន្តរាគមន៍ភ្លាមៗក្នុងករណីមានតម្រូវការ និងពង្រីក និងបង្កើតទីផ្សារបន្ថែម។
ឆ្លៀតក្នុងឱកាសនេះដែរ, សម្តេចបវរធិបតី នាយករដ្ឋមន្ត្រី បានលើកឡើងថា ការដាក់ចេញគោលនយោបាយត្រឹមត្រូវ គឺបានធ្វើឱ្យយើងម្ចាស់ការ តាមរយៈការពង្រឹង ការអប់រំ, វិស័យសុខាភិបាល, ហេដ្ឋារចនាសម្ព័ន្ធរូបវ័ន្ត, បច្ចេកវិទ្យា អ៊ិនធើណែត បានធ្វើឱ្យកម្ពុជា អាចតទល់បានដោយងាយស្រួល សម្រាប់ការព្យាយាមគំរាមគំហែងមកកម្ពុជា ទាំងផ្នែកនយោបាយ, យោធា និងសេដ្ឋកិច្ច។ កម្ពុជាបានប្រែក្លាយកន្លែងដែលធ្លាប់ជាកន្លែងគ្រាប់ផ្លោង ឱ្យក្លាយជាកន្លែងធ្វើកសិកម្ម, ក្នុងន័យនេះ, សម្តេចបវរធិបតី នាយករដ្ឋមន្ត្រី បានដាក់ចេញឱ្យក្រុមការងាររបស់រាជរដ្ឋាភិបាល ធ្វើការ អភិវឌ្ឍវិស័យកសិ-ឧស្សាហកម្មនៅទិសខាងលិច ដើម្បីធានាដល់ការងារ និងផលិត ហើយលើក កម្ពស់ផលិតផលក្នុងស្រុក, ព្រមជាមួយគ្នានេះ, យើងនឹងជំរុញការអភិវឌ្ឍហេដ្ឋារចនាសម្ព័ន្ធ។ ដូចនេះ, កម្ពុជាយើងនឹងត្រូវធ្វើពិពិធកម្មសេដ្ឋកិច្ច និងដៃគូសហប្រតិបត្តិការ ដោយមិនពឹងដង្ហើមគេដក ហើយត្រូវធានាដល់ដៃគូដែលជាការធានាសន្តិសុខនៃការផលិត និងទីផ្សារ។
សូមបញ្ជាក់ថា រាជរដ្ឋាភិបាលបានកំណត់យក ថ្ងៃទី១ ខែកក្កដា ជាទិវាមច្ឆជាតិ ក្នុងគោលបំណងផ្សព្វផ្សាយ និងបំផុសស្មារតីឱ្យគ្រប់តួអង្គពាក់ព័ន្ធចូលរួមការពារ និងអភិរក្សធនធានជលផល ធម្មជាតិ ឱ្យស្ថិតស្ថេរគង់វង្ស សម្រាប់កូនចៅជំនាន់ក្រោយ ហើយដើម្បីធានាការគ្រប់គ្រងធនធានជលផល រាជរដ្ឋាភិបាលបានរៀបចំឱ្យមានច្បាប់ស្តីពីជលផល ដែលនឹងក្លាយជាឧបករណ៍គតិយុត្តិថ្មី ស្របនឹងបច្ចុប្បន្នភាពនៃស្ថានភាពសេដ្ឋកិច្ច សង្គម និងនយោបាយនៅកម្ពុជា ក្នុងការពង្រឹងការគ្រប់គ្រង អភិរក្ស និងអភិវឌ្ឍធនធានជលផលឱ្យកាន់តែមានប្រសិទ្ធភាពខ្ពស់ថែមទៀត។
ការកំណត់ឱ្យមានរដូវបិទនេសាទទឹកសាប ចាប់ពីដើមខែមិថុនា ដល់ចុងខែតុលា គឺដើម្បីទុកពេលឱ្យត្រីពងកូន បន្តពូជ និងរីកលូតលាស់ធំធាត់នៅរដូវទឹកដំឡើង ដែលនឹងផ្តល់ជាប្រភពចំណូលប្រចាំថ្ងៃរបស់ប្រជានេសាទ និងជាប្រភពអាហារចម្បងរបស់ប្រជាពលរដ្ឋនៅទូទាំងប្រទេស។
មុននឹងបញ្ចប់, សម្តេចបវរធិបតីនាយករដ្ឋមន្ត្រី បានបញ្ជាក់ជំហរយ៉ាងច្បាស់របស់កម្ពុជាអំពី ករណី បិទ ឬបើកព្រំដែនកម្ពុជា-ថៃ គឺកូនសោអាស្រ័យលើភាគីថៃប៉ុណ្ណោះ, ព្រោះថៃជាអ្នកបង្កើតនូវបញ្ហានេះ ដោយបានសម្រេចឱ្យមានការបិទ ឬការបើកដោយខ្លួនឯង ជាឯកតោភាគី គិតចាប់ពីថ្ងៃ៧ ខែមិថុនា កន្លង ទៅ ដោយមិនត្រូវម្តងបិទ ឬ ម្តងបើក ដោយគ្មានគោលជំហច្បាស់លាស់ និងចេតនាត្រឹមត្រូវ។ ចំពោះកម្ពុជា គឺ រក្សាគោលជំហរយ៉ាងច្បាស់ និង យ៉ាងសាមញ្ញ ដោយថៃជាអ្នកដោះស្រាយ ចាក់សោរដោយប្រកាសបើក ឱ្យដូចដើមវិញគ្រប់ច្រកព្រំដែន និងសន្យាមិនឱ្យកើតមានឡើងជាថ្មី ពិសេសនឹងមិនមានការបិទ ឬបើកច្រកដោយឯកតោភាគីដូចមុនជាថ្មី ដើម្បីធានាដល់និរន្តភាពនៃ ការ ធ្វើទំនាក់ទំនង ពាណិជ្ជកម្មរវាងប្រទេសទាំងពីរ, បម្រើផលប្រយោជន៍ប្រជាជនទាំងពីរ។ កម្ពុជា នឹងពិនិត្យបើកដំណើរការឡើងវិញទាំងអស់យ៉ាងយូរត្រឹមរយៈពេល ៥ ម៉ោង។ អ្វីដែលកម្ពុជាធ្វើ គឺដើម្បីតែការពារសេចក្តីថ្លៃថ្នូរ, កិត្តិយស, ភាពត្រឹមត្រូវ, ការពារបូរណភាពទឹកដី និងបម្រើឧត្តមប្រយោជន៍ជាតិខ្មែរ, ពោលគឺ កម្ពុជាប្រកាន់ខ្ជាប់នូវការជ្រើសយកច្បាប់អន្តរជាតិ និងសន្តិភាព៕
