កំពង់ធំ ៖ ព្រះគ្រូចៅអធិការ និងគណៈកម្មាការអាចារ្យវត្ត បានអំពាវនាវ ដល់សប្បុរសជននានាទាំងនៅទីជិត និងទីឆ្ងាយទាំងអស់ ចូលជាបច្ច័យ ដើម្បីបានដាក់អោយដំណើរការសាងសង់ស្ពានថ្មមួយឆ្លងកាត់ដងស្ទឹងសែនស្ថិតនៅក្នុង ភូមិកំពង់ស្វាយ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ សម្រាប់បំរើអោយវិស័យព្រះពុទ្ធសាសនា និងវិស័យសាធារណៈនានាជាច្រើនទៀត ជាពិសេស សម្រាប់តភ្ជាប់ដង្ហើមសេដ្ឋកិច្ចគ្រួសារ នៅក្នុងតំបន់នោះ អោយមានលក្ខណៈកាន់តែប្រសើរឡើងថែមទៀត។
ស្ពាននេះត្រូវបានសាងសង់ឡើង ក្រោមការផ្តួចផ្តើមគំនិត និងដឹកនាំការសាងសង់ ដោយព្រះគ្រូចៅអធិការ និងគណៈកម្មាការអាចារ្យវត្ត « កំពង់ស្វាយ » ប្រជាពុទ្ធបរិស័ទចំណុះជើងវត្ត រួមជាមួយសប្បុរសជននានា ដែលបានបរិច្ចាគធនធានថវិកា ជួយដល់ដំណើរការសាងសង់ស្ពាននោះ រហូតសម្រេចបានលើការសាងសង់ ប្រមាណជាង៧០ភាគរយហើយ និងនៅខ្វះប្រមាណជាង ២០ភាគរយទៀត ប៉ុណ្ណោះ ទើបបញ្ចប់លើគម្រោងសាងសង់ស្ពាននេះ។
គណៈកម្មការអាចារ្យវត្តកំពង់ស្វាយ លោកព្រឹទ្ធាចារ្យ លី ប៊ុនស៊ីម បានមានប្រសាសន៍អោយដឹងថា កាលដើមឡើយទីតាំងសាងសង់ស្ពានថ្មនេះ មិនធ្លាប់មានស្ពានសង់ឆ្លងកាត់ដងស្ទឹងសែននេះទេ ហើយប្រជាពុទ្ធបរិស័ទ ក៏ដូចជាប្រជាពលរដ្ឋទូទៅ ចង់ធ្វើដំណើរមកកាន់ទីអារ៉ាម ឬក៏ការដឹកជញ្ជូនកសិផលនានា ពីក្នុងតំបន់ទៅកាន់តំបន់មួយទៀតដើម្បី ទៅកាន់ទីផ្សារ គឺត្រូវធ្វើដំណើរឆ្លងកាត់ទឹកស្ទឹងសែននេះ តាមរយះការជិះទូក ឬ ជិះក្បូន ទើបទៅដល់គោលដៅដែលខ្លួនចង់ទៅ។ លោកព្រឹទ្ធាចារ្យ មានប្រសាសន៍ទៀតថា ដោយមើលឃើញ ការលំបាក ក្នុងការធ្វើដំណើរឆ្លងកាត់ដងស្ទឹងសែននេះ ព្រះគ្រូចៅអធិការវត្ត ព្រះនាម ឈន ប៊ុនហ៊ង រួមជាមួយគណៈកម្មាការអាចារ្យ វត្តកំពង់ស្វាយ បានរីអង្គាសថវិកា និងការចូលជាបច្ច័យ ពីប្រជាពុទ្ធបរិស័ទចំណុះជើងវត្ត ជាមួយនឹងការចូលរួម ពីសប្បុរសជននានា ទាំងនៅទីជិត និងនៅទីឆ្ងាយ ទាំងនៅក្នុងស្រុក និងនៅក្រៅស្រុកផងនោះ ប្រមូលបានថវិកាជាបន្តបន្ទាប់ ហើយព្រះគ្រូចៅអធិការវត្ត បានសម្រេចបង្កើតគណៈកម្មាការវត្តថ្មីមួយ ដើម្បីគ្រប់គ្រងលើគម្រោងសាងសង់ស្ពាន និងដាក់អោយដំណើរការសាងសង់ស្ពានថ្មមួយនេះ សម្រាប់បំរើអោយវិស័យសាសនា និងវិស័យសាធារណៈ នៅក្នុងមូលដ្ឋាននេះ អោយមានលក្ខណៈ កាន់តែល្អប្រសើរឡើងថែមទៀត។
លោកព្រឹទ្ធាចារ្យ លី ប៊ុនស៊ីម បានបន្តទៀត ស្ពានថ្មមួយនេះ គឺមានបណ្តោយប្រវែង ១៥១ម៉ែត្រ និងមានទទឹង ៥,១ម៉ែត្រ « ៥ម៉ែត្រ ១តឹក » ហើយបានចាប់ផ្តើមសាងសង់ នៅថ្ងៃទី២៤ ខែមិនា ឆ្នាំ២០១៨ រហូតមកដល់គ្រាបច្ចុប្បន្ននេះ។ លោកអាចារ្យថា ការសាងសង់ស្ពាននេះ បានធ្វើឡើងជាជំហានៗ ទៅតាមថវិកាដែលប្រមូលបានពីសប្បុរសជន ដោយដំណាក់កាលទី១ ចាក់ផ្ជើ វាយផ្ជើ និងការចាក់ផ្នែន ដោយបានចំណាយថវិកាអស់ ៨ម៉ឺន ៥ពាន់ដុល្លារអាមេរិក ។ ដំណាក់កាលទី២ ចាក់សសរស្ពាន និងចាក់ធ្នឹមទទឹងស្ពាន បានចំណាយថវិកាអស់ ១១ម៉ឺន ៥ពាន់ដុល្លារអាមេរិក និងការសង់ធ្នឹមបណ្តោយសងខាង ដោយចំណាយថវិកាអស់ ១៦ម៉ឺនដុល្លារអាមេរិក បន្ថែមទៀត ជាសរុបអស់ថវិកា ចំនួន ៣៨ម៉ឺនដុល្លារអាមេរិក។ លោកព្រឹទ្ធាចារ្យ បានបញ្ជាក់ថា រហូតមកទល់នឹងពេលនេះ ស្ពានថ្មដែលសាងសង់ឆ្លងកាត់ដងស្ទឹងសែនមួយនេះ គឺសម្រេចបាន ៧៥ភាគរយហើយ និងនៅសល់តែ ២៥ភាគរយទៀត ប៉ុណ្ណោះ ដែលនឹងត្រូវបញ្ចប់លើការសាងសង់ នៅក្នុងឆ្នាំ២០២១ ខាងមុខនេះ អាចនឹងត្រូវចំណាយថវិកា ប្រមាណជា ១១ម៉ឺនដុល្លារទៀត ទើបការសាងសង់ស្ពាននេះ បានរួចរាល់ជាស្ថាពរ ១០០ភាគរយ។ ប៉ុន្តែ នៅពេលនេះ ដំណើរការសាងសង់ស្ពាននេះ ត្រូវបានផ្អាកជាបណ្តោះអាសន្ន មួយគ្រាសិន ព្រោះត្បិតខ្វះថវិកាក្នុងការសាងសង់។
ព្រះគ្រូចៅអធិការវត្តកំពង់ស្វាយ ព្រះនាម ឈន ប៊ុនហ៊ង រួមជាមួយគណៈកម្មាការអាចារ្យវត្ត បានមានសង្ឃដីកា និងការអំពាវនាវ ទៅដល់សម្តេច ទ្រង់ អ្នកឧកញ៉ា លោកឧកញ៉ា ឯកឧត្តម លោកជំទាវ លោក លោកស្រី ប្រជាជាពុទ្ធបរិស័ទ និងសប្បុរសជននានា ទាំងក្នុង និងក្រៅប្រទេស សូមមេត្តាចូលរួមជាបច្ច័យកសាងស្ពាននេះបង្ហើយ ដើម្បីទុកជាប្រយោជន៍រួម សម្រាប់មនុស្សជាតិទូទៅ ការបំរើអោយវិស័យសាសនា និងវិស័យសាធារណៈ នានាជាច្រើនទៀត នៅក្នុងសង្គមជាតិទាំងមូល។
សប្បុរសជន អាចទំនាក់ទំនងចូលជាបច្ច័យបានតាមរយះ ព្រះគ្រូចៅអធិការវត្តកំពង់ស្វាយ ព្រះនាម ឈន ប៊ុនហ៊ង ដែលមានលេខទូរស័ព្ទពីរប្រព័ន្ធ គឺ ០៩៩ ៤៣៥ ១៨៤,០៩៧ ៥ ៦៤០ ៥១១ និងគណៈកម្មការអាចារ្យវត្ត លោកព្រឹទ្ធាចារ្យ លី ប៊ុនស៊ីម ដែលមានលេខទូរស័ព្ទ ០១២ ៩៦៤ ២៩១ ,០៩៧ ៦ ៧៥៥ ៧៤៧ សូមអរព្រះគុណ និងសូមអរគុណ ៕
ប៊ុន រិទ្ធី
