កំពង់ធំ៖ គ្រោះថ្នាក់ចរាចរណ៍ រថយន្ដ បុករថយន្តសណ្តោងស៊ឺមីរ៉ឺម៉ក បើកបរបត់ឆ្វេងទិសដៅស្របគ្នាបណ្ដាលឲ្យរបួសស្រាល០៣នាក់ (ប្រុស) ខូចខាតរថយន្ដ០២គ្រឿងហេតុការណ៍នេះបានកើតឡើងកាលពីវេលាម៉ោង ០៧ និង ៣០នាទី ថ្ងៃអង្គារ៍ ៧កើត ខែពិសាខ ឆ្នាំជូត ទោស័ក ព.ស២៥៦៣ ត្រូវនឹងថ្ងៃទី២៨ ខែមេសា ឆ្នាំ២០២០ នៅលើកំណាត់ផ្លូវជាតិលេខ៦២ ចន្លោះគីឡូម៉ែត្រលេខ ៩-១០ ភូមិកូនត្នោត ឃុំជ័យ ស្រុកកំពង់ស្វាយ ខេត្តកំពង់ធំ ។
សមត្ថកិច្ចបានអោយដឹងថារថយន្ដម៉ាកហ៊ីហ៊ិនដាយ ពណ៌ស ផ្លាកលេខកំពង់ចាម3A.3248 (របស់ក្រុមហ៊ុនដឹកជញ្ជូន ឡោ.ម៉េងហួតL.M.H) សណ្តោងស៊ឺមីរ៉ឺម៉ក គ្មានផ្លាកលេខ ផ្ទុកស៊ីម៉ង់ (បើកបរទិសដៅពីត្បូងទៅជើង ហើយបត់ឆ្វេងត្រឡប់ក្រោយ) ដោយឈ្មោះ ថន.ម៉េងល័ង ភេទប្រុស អាយុ ២៦ឆ្នាំ រស់នៅភូមិវ៉ារិន្ទ ឃុំខ្ចៅ ស្រុកកងមាស ខេត្តកំពង់ចាម មុខរបរបើកបររថយន្ត (គ្មានរបួស)(នាំខ្លួនទៅអធិការដ្ឋាននគរបាលស្រុកកំពង់ស្វាយដើម្បីសួរនាំ)។
ចំណែកម្ខាង់ទៀតរថយន្តហ៊ីហ៊ិនដាយ(ឃ្លុប) ក្បាលពណ៌ស ឃ្លុបពណ៌ក្រហម ផ្លាកលេខកំពង់ធំ3A.2047 ផ្ទុកទឹកបាកាល (បើកបរផ្លូវត្រង់ពីត្បូងទៅជើង) ដោយឈ្មោះ ឆិញ.ចាន់សារុំ ភេទប្រុស អាយុ ៣៧ឆ្នាំ មុខរបរបើកបររថយន្ត នៅភូមិព្រែកស្បូវ សង្កាត់អូរកន្ធរ ក្រុងស្ទឹងសែន ខេត្តកំពង់ធំ (របួសស្រាល)។ អ្នករួមដំណើរចំនួន០២នាក់ៈ
១-ឈ្មោះ រិន.ចាន់សេរីវឌ្ឍន៍ ភេទប្រុស អាយុ ១៥ឆ្នាំ មុខរបរសិស្ស រស់នៅភូមិកំពង់រទេះ សង្កាត់កំពង់រទេះ ក្រុងស្ទឹងសែន ខេត្តកំពង់ធំ(របួសស្រាល)។ ២-ឈ្មោះ ឆិញ.ចាន់សារ៉ង់ ភេទប្រុស អាយុ ២៨ឆ្នាំ មុខរបរធ្វើស្រែ រស់នៅភូមិក្តីដូង ឃុំក្តីដូង ស្រុកកំពង់ស្វាយ ខេត្តកំពង់ធំ(របួសស្រាល)។
ក្រោយកើតហេតុ សមត្ថកិច្ចបានចុះវាស់វែងនៅទីកន្លែងកើតហេតុ ធ្វើកំណត់ហេតុប្រមូលវត្ថុតាងយករក្សាទុកនៅអធិការដ្ឋាននគរបាលស្រុកកំពង់ស្វាយ រងចាំដោះស្រាយគ្នាតាមច្បាប់
សមត្ថកិច្ចជំនាញបានបញ្ជាក់ថាមូលហេតុបឋមបង្កឡើងដោយអ្នកបើកបររថយន្តសណ្តោងស៊ឺមីរ៉ឺម៉កឈ្មោះ ថន.ម៉េងល័ង បើកបរបត់ឆ្វេងត្រឡប់ក្រោយខ្ជីខ្ជាខ្វះការប្រុងប្រយ័ត្ន ៕
ប៊ុន រិទ្ធី
